Markos Untzeta

“Ekilibrista” bere seigarren diskoak ez du Markos Untzetaren ildo musikalean etendura estilistikorik eragingo, ezta pop musikaren historian ere. Erronka berri eta zirraragarrien bila asegabera bultzatzen gaituen mundu ero honetan, agian disko xarmagarri honek eskatzen duen atentziorako parada eta pazientzia izatea da erronkarik handiena. Afektu txikiak, egunerokoak eta ia nabari ezinak baitira benetako bakarrak.

“Ekilibrista”, xumetasun eta arreta handiz landutako disko txiki-handia da. Folk, country eta pop-rock egitura aski ezagunetan mugitzen da Markos Untzetaren ahots hareatsu, sakona eta hain berezkoa. Baina musikari laukotearen fintasunari esker edertasun oso bereziko paisaia lausoak marrazten zaizkigu hitz horien atzean. Protagonismorik eskatu gabe, lagun sendo eta apaingarri dotore beti.