SERRANO/COLINA PROJECT

 

Antonio Serrano
(Madril, 1974) 7 urte zituenean hasi zen musika ikasten, aitarekin, eta
honek musika irakurtzen eta aho-soinua jotzen irakatsi zion. Gero
Piano, Biolin eta Perkusio ikasketak egin zituen Alacanteko eta
Madrilgo kontserbatorioetan, oso kalifikazio onak lortuz. Londresen
ondu zituen aho-soinu ikasketak, Larry Adler maisuarekin.
Aho-soinuarekin teknika bikaina garatuta, hainbat musika testuingurutan
lan egiteko aukera izan du, musika Klasikoarekin, Jazzarekin,
Flamenkoarekin, Tangoarekin eta baita Poparekin ere.
Bakarlari gisa egindako karreran besteak beste de Belgika, Cologne,
Heidelberg, Kiel eta Istanbuleko orkestra sinfonikoekin jo du, H.
Villalobos, M. Arnold, V. Williams eta beste batzuek aho-soinuarentzat
idatziriko kontzertuak interpretatzen, edo G. Enescu, G.Gershwin,
Piazzolla eta R. Korsakoven obren konponketak jotzen. Paco de Lucíaren
taldeko kidea izan da Antonio azkeneko 4 urteetan, eta Pacorekin 3 bira
egin ditu munduan barrena. Jazz musikari gisa, berriz, honako hauekin
jo du, besteak beste: Winton Marsalis, Toots Thielemans, Jerry
Gonzalez, Ivan Lins, Chano Domínguez, Lou Bennet, Jorge Pardo, Vicente
Amigo, Tomatito eta Perico Sambeat.
Saioko musikari gisa 250 kolaborazio baino gehiago grabatu ditu nazioko
Pop-Rock artista gehienekin (Pedro Guerra, Joaquín Sabina, Ana Belén,
Victor Manuel besteak beste), eta hots bandekin, esate baterako, Pedro
Almodóvarren Carne Trémula obran.
Antonio Serrano aitzindariaren diskografiak 6 disko biltzen ditu,
azkenekoa Astor Piazzollari egindako Omenaldia, 2007an SONY BMG-n
argitaratua, Madrilgo eta Gasteizko Jazzaldietan aurkeztua musikari
argentinar eta uruguaiarrak lagun zituela.

Javier Colina (Iruñea, 1960) kontrabaxu jotzailea
90. hamarraldiaren hasieran hasi zen nabarmentzen, jazz flamenko
deituaren kontzertu eta grabazioetan. Chano Domínguez eta Guillermo
McGuill musikariekin batean, piano jotzaile cadiztarraren hirukotea
osatzen du, eta eurekin parte hartzen du mundu osoko jazzaldietan eta
Fernando Truebak zuzendutako Calle 54 filmean.
Eskarmentu handiko musikariekin eskaini dituen kontzertuek eta
grabazioek bermatuta dago Colinaren jazzaren inguruko prestakuntza.
Izan ere, George Cables, Hank Jones, Barry Harris eta bereziki Tete
Montoliú izan ditu lagun.
Kontrabaxuarekin flamenkoari egindako ekarpenak ere isla garbia du Tomatito, Joaquín Cortés, Diego El Cigala, Ketama eta bete batzuekin eskainitako emanaldietan eta grabazioetan.
Era berean, aipagarria da Maliko musikariekin egindako musika
topaguneak, horien artean nabarmentzekoa koraren maisuarekin, Toumani
Diabatérekin batera, grabatutako Djelika diskoa.
Geroago Juan Perroren proiektuekin bat egin zuen, eta honek eragin
handia izan zuen haren musikaren ikuspegian, pop, rock eta Kubako son
moldeekin esperimentatzearen inguruan. Harekin batera jardun zuen bira
“flamenkoan” eta ondorengo grabazioan eta “Raíces al viento” izenburuko
itzulian.
Fort Apache Band taldearekin egindako birak harrotasunez betetzen du,
bertan topatu baitzuen jazz eta musika latinoa biltzen dituen talde
onenetako bat bere aitzindariarekin, Jerry González tronpeta eta kongo
jotzailearekin batean, azken hau beste hainbat proiektutan izan baitu
lagun.
Calle 54 filmaren aurkezpenean, Parisen, lehenengo aldiz jo zuen Bebo
Valdés piano jotzailearekin. Geroago kontzertu bat eskaini zuten
Madrilgo Albeniz Antzokian, zeinetan Diego El Cigala
deituak ere parte hartu zuen. Une horretatik aurrera Javier Colina
nazioartean izen handia lortuko zuen Lágrimas Negras diskoaren
grabazioaren hiru zutarrietako bat bihurtu zen. Ondorioz, Bebo Valdés,
Chucho Valdés eta El Cigala artistekin kontzertuak eta
aurkezpenak egin zituen, bestelako emanaldiak, duo eta laukote
moldeetan, Beborekin, albora utzi gabe. 2005eko azaroan Bebo Valdésekin
batera jardun zuen aste betez New Yorkeko Village Vanguard elkarte
ospetsuan, eta emanaldiak grabatu egin zituzten Fernando Truebaren
zigiluarekin luze gabe kaleratuko den diskoa osatzeko.
Orain gutxi merkaturatu da bere Si te contara izenburuko diskoa. Bertan
tres kubatarrean ezinbestekoa den Pancho Amat du laguntzaile. Habanan
ezagutu zuen 1994an, Juan Perrorekin lan egiten zuenean. Ez ohiko
zazpikote honek jazz izpirituetan oinarritutako musika proposatzen du,
son kubatarraren erritmora. Talde hau arrakasta handiz aurkeztu da
besteak beste Donostiako eta Madrilgo nazioarteko jazzaldietan.

Guillermo McGill (Uruguay, 1965). Perkusio
jotzailea.
Sortzez uruguaitarra den arren, Guillermo McGill Bartzelonako semetzat
har daiteke. Bi urte zituenean iritsi zen Bartzelonara, eta bertan hazi
eta hezi zen profesionalki. Hamabost urte zituenean Taller de Músics
tailerreko big bandean eta beste jazz taldeetan jotzen zuen. Garai
hartan hiru aldiz saritu zuten, lehenengo sariarekin, Jazz Gazte
Interpretarien Nazio mailako Lehiaketan. Era berean, aipagarria da Jazz
Konposizioaren Nazio mailako 1993ko Lehiaketan irabazitako lehenengo
saria.
Bere karreran zehar Barry Harris, John Abercrombie, Joe Pass eta Marc
Johnson bezalako musikariak lagundu ditu. Jazzarekin ez ezik
flamenkoarekin ere ausartzen da, mintzaira hori bere egin baitu beraren
musikarentzat. Izan ere, ezinbesteko artistekin jo du, esate baterako
Enrique Morente abeslariarekin eta Rafael Riqueni gitarra
jotzailearekin, besteak beste. Gainera, Chano Domínguezen seikoteko
kidea da, talde horrekin grabatu baitzuen “Calle 54” jazz latinoaren
diskoa eta, geroago, piano jotzailearen “Oye cómo viene” albuma eta
haren osagarri “Mira cómo viene” DVDa. Bakarlari gisa “Los sueños y el
tiempo” grabatu zuen 1999an, eta “Cielo” 2002an. Ekoizle gisa
aipagarria da Ana Salazar abeslariarentzat “Ana Salazar canta a Editg
Piaf” (Karonte, 2003) diskoan egindako lana.

Iván Lewis Melón. Espainian bizi den piano
jotzaile kubatarra da, nazioartean ezaguna, bakarlari gisa egindako
lanek eta besteekin egindakoek erakusten duten bezala. Guztien
gainetik, harrigarria da konpositore gisa darion kalitatea.
Prestakuntza klasikoko piano jotzailea izaki, Winton Marsalis eta
Patato Valdés bezalakoekin lan egin du. Habanako Arte Institutu
Gorenean graduatua, Irakere taldeko kidea izana da, eta Kubako musika
esparruko musikari askorekin batera jo du, hasi Pablo Milanésekin eta
buka Gonzalo Rubalcabarekin. David Murray, Michael Mossman, Steve
Coleman, Roy Hargrove, Adam Nussbaum eta Chucho Valdés bezalako artista
handiekin lan egin du. Eta Europako jazzaldi ezagunenetan parte hartu
du (Jazzen Tete, Jazz in Marciac, Montreal Jazz Festival, North Sea
Jazz Festival, Montreaux Jazz Festival, Nice Jazz Festival, Gasteizko
Jazzaldia, Donostiako Jazzaldia, etab…).

Albisteak