Entzun MP3-an: GAUR GAUEZ
Udazkenak ekarri digu Kemen Lertxundiren (Ondarroa, Bizkaia 1979) bigarren lana, Begi berriak atzo gaueko irudientzat izenekoa, eta nekez irits zitekeen garai egokiagoan. Udazken usaina duen lana da. Orbel horiztatuz inguratu eta barnera begiratzera bultzatzen zaituena, itsas-adar galduren bateko farotik olatuen eternitateari begiratzeko gonbita egiten duena. Barne arrakalak, iraganeko zauriak, oroimen gazi-gozoak eta Charlie Rivelen sudur gorria bera malenkonia zelofan eder batez biltzen dituena. Folkaren, poparen eta kantugilearen eremuak poetikotasunez elkar gurutzaten dituena.
